中環出更：彭耀佳籲僱主勿短視應鼓勵員工進修
唔少學生哥都期待告別校園，可以放低苦讀多年嘅課本，不過唔少人投身職場之後，又會想重返校園，到底重返校園難唔難呢？香港教育大學尋日舉行學位頒授典禮，唔少名人都有出席，佢哋都好支持持續進修，其中香港總商會前主席彭耀佳仲話，有遠見嘅僱主要多鼓勵下屬添。
教大尋日舉行學位頒授典禮，向五位傑出人士頒授榮譽博士學位，彭耀佳就係其中一位，佢太太同媽媽都有現身支持。而教大校董會主席馬時亨、司庫趙麗娟，以及擔任教大研究講座教授嘅運輸及房屋局前局長張炳良等都有出席。
彭耀佳話，作為重返校園嘅過來人，重拾課本確係有難度，因為要平衡工作同學業，所以最好趁未有家庭壓力時去進修。佢又認為，僱主唔應該因為擔心下屬難喺工作同學業之間取得平衡，就唔鼓勵佢哋進修，因為咁做係太短視喎。
趙麗娟：吸收能力與年齡無關
趙麗娟亦都話好想繼續讀書，直言讀書就開心，因為讀幾多、讀乜嘢都唔受他人控制，而吸收能力亦同年齡無關，以修讀工商管理為例，有工作經驗嘅話反而更優勝，所以唔一定要趁後生讀書喎。佢又話，見過有老年人讀書，認為最重要係保持腦筋靈活，而跑馬同打麻將都係適合老人家嘅活動，佢就更加係自幼已學識打麻將，但就因為學識咗太耐，反而覺得悶喇。
同場嘅馬時亨就大呻最近好多嘢做，事關大女馬露明身懷龍鳳胎。佢仲話，個女為咗迎接新生命，就將唔少傢俬搬咗去佢屋企，又為將來要湊三個小朋友苦惱。不過馬時亨就話，好彩佢住喺個女樓下，可以隨時幫手照顧孫仔孫女。佢個女聽到佢咁講，唔知會唔會安心啲呢？
卓妮