喺廣東話入面，同「水」字有關嘅字眼有好多，當中有褒有貶。譬如話由食環署同屋宇署合組而成嘅滲水辦咁吖，就可算係「威水」嘞，事關呢兩個水鬥水嘅部門組成嘅係水皮辦，市民旨意呢班庸官解決滲水問題，就真係凍過水，唔怪得呢個廢衙門經常性成為申訴專員公署同審計署開波炮轟嘅寵兒。
呢，申訴專員公署近日再次主動調查滲水辦，話得係「再調查」，就知滲水辦係錯而不改嘅啦。過去一年多，公署收到針對滲水辦未處理好滲水嘅投訴多達三百六十宗，有個案直頭拖足十年都未解決。好似市民劉先生入住九龍灣麗晶花園，○二年開始天花滲水，滲水辦人員查驗咗五至六次都係得個吉。年前滲水問題惡化，有石屎跌落床邊，差啲搞出人命咁大劑，點知滲水辦竟然話「冇即時危險」，劉先生焗住棄屋租樓住，認真慘情！
點解滲水辦搵唔出滲水源頭？鬼咩，呢個廢衙門唔識與時俱進，仲沿用咸豐年嘅色水測試方法，簡直嘥錢嘥時間嘥食水，加上官僚作風，話之市民屋企滲水有幾困擾，搞到生蟲又好，水滴石穿導致石屎剝落扑親頭也罷，總之長命工夫Hea住做。早喺一二年，審計報告已狠批食環署調查滲水辦歎慢板；一六年再發表報告，炮轟兩個衙門龜速處理滲水投訴。結果係點？結果係找到滲水源頭嘅成功率不升反跌，吹脹！
所以話啫，官老爺最叻就係批評接受，態度照舊，官官相護，睇怕今次申訴署「再調查」最終都係無功而返。你知喇，三個和尚冇水飲，滲水辦由食環同屋宇兩部門組成，互相睇對方唔順眼，平時忙住鬥賴皮推莊，水兵鬥海軍，早前更鬼打鬼去立法會告狀，搞到「家醜」外揚成為千夫所指，更驚動申訴署添。
之不過咁，咪睇滲水辦廢柴一堆，終日以鬥氣為樂，但絕對有機會獲特衰政府授勳o架。有辦你睇，鉛水事件害苦咗無數市民，嗰位罪魁禍首水務署署長唔單止唔使被問責，更獲頒銀紫荊星章，「表揚」佢餵市民飲鉛水添。再講吖，任內醜聞多多、將民航大樓當成私人王國嘅前民航處處長，咪一樣係袋袋平安，印印腳退休。以港府賞罰不明嘅往績睇，滲水辦就算攞唔到荷蘭水蓋，都一定有林鄭呢個奶媽喺背後力撐。睇到啦，港官只識齋噏「民生無小事」，實際上就話之市民死，無論風災善後定係處理滲水，只要唔係權貴，呢個政府眼尾都唔會望吓。呢啲咁廢嘅水皮港府、水皮庸官一日唔散水，香港人都唔會有好日子過。