中環出更：梁栢賢退休藍圖要儲定豬朋狗友
工作佔人生大部分時間，為咗調劑生活，唔少人都早早訂下退休大計，好似醫院管理局行政總裁梁栢賢明年就會退休，原來佢早已有退休藍圖，其中包括儲定豬朋狗友喎。到底有乜嘢關係呢？
梁栢賢話人生分四階段，每個階段有二十年時間，而自己即將踏入第四階段，將會多咗時間喺屋企，所以要一早維繫好家庭關係。另外，佢話退休後唔會再煩同事，所以依靠豬朋狗友打發時間喎，佢進一步解釋，朋友要有共同經歷先有話題，所以平日要對人好、儲定朋友囉，但最重要大家身體健康先有得繼續玩。佢同班老友認識咁多年，相信唔會介意畀佢形容做豬朋狗友嘅！
李國棟幫手內地設診所
當日活動係香港專業人士聯會就職典禮，唔少名人都到場支持，包括香港菁英會榮譽主席洪為民、香港醫學專科學院前主席李國棟，而聯會主席潘德鄰、理事兼秘書長衛小芊等主人家就忙於招呼賓客。
李國棟啱啱成為第二位港人出任世界家庭醫生組織主席，相信即使達到退休年齡嘅佢，有排都唔使諗退休喇！佢就話未來仲有大計，就係喺內地幫手設診所，因為內地剛興起睇私家醫生而有商機咁話。
洪為民就仲有一段時間先退休，所以從未諗過退休大計，佢覺得要保持自己忙碌，事關見過唔少人退休幾年就突然離世。佢亦會花時間注重健康，好似將會去加納開會，都預早打定預防針同食藥，仲話習慣帶定樽裝水去外地避免水土不服添！
卓妮