財政司司長陳茂波（波叔）喺今年二月發表嘅預算案，起初撳住荷包唔肯派錢，喺壓力下先公布選擇性派發四千元嘅關愛共享計劃，相隔九個月啲錢都過唔到市民手，財經事務及庫務局局長劉怡翔尋日喺立法會被多名議員炮轟，大鬧計劃「超複雜、搞勁耐、浪費人力物力」。雖則話要搞一個系統可以派錢畀市民，之但係有冇需要搞咁耐呢？波叔係咪抱住嗰種「啲錢放我度好過放喺你度」嘅思維，派錢都簡單複雜化，搞到劉怡翔變箭靶呀！
