政情：八網難逃：着三件頭摘富貴柿 黃傑龍：好神奇
相信大家都去過農場摘水果，通常都係着便服，最多因為泥地怕整污糟，於是加多對水鞋咁，勢估唔到有人竟然係着西裝去摘生果。
講緊邊個？咪就係稻苗學會會長黃傑龍（Simon）囉！搞邊科呀？原來佢去咗日本考察，仲誇張到着住三件頭去摘富貴杮，仲話呢身裝束可以開發新品牌叫「正官莊富貴柿」添！
網友：全副西裝摘生果 極違和
Simon喺社交網站上載咗張摘富貴杮嘅相之後，有幾個網友都覺得好有趣，問佢着住三件頭會唔會好熱呀？佢回覆話嗰度氣溫廿度以下，所以又唔係太熱，亦有網友話：「全副西裝摘啲水果，極之違和。」佢亦話自己都覺得好神奇，所以一定要把這個時刻記錄低，仲有網友話想整番箱富貴杮返嚟添！
之不過，來來回回幾次對話，Simon都冇解釋到點解要着三件頭去摘富貴杮喎。