中環出更：吳克儉煲煙斷正 唔怕教壞細路？
鮮有喺人前食煙嘅教育局前局長吳克儉（吳得掂）原來係煙民，早排見到佢喺旺角一間酒店外嘅吸煙區度食煙。好彩佢已經唔再係教育局局長，否則畀學生哥見到，實畀人話教壞細路喇！
曾稱冇諗過做教育局局長
話說當日吳得掂獲邀出席一間公司嘅周年酒會，酒會原定傍晚六時喺旺角一間酒店舉行，但六時十分左右，一頭白髮嘅吳得掂就被發現喺該酒店嘅吸煙區吸煙，一啲都唔似趕時間嘅人。佢大約兩分鐘吸完煙，將煙頭掉落垃圾桶，就離開吸煙區嘞！不過，咪以為吳得掂煲完煙就去酒會，事關酒會上並唔見佢嘅身影，唔知佢係咪臨時有事甩底呢？
吳得掂喺教育局任內嘅爭議好大，民望亦屢創新低，佢頻頻外訪而被戲稱為「旅遊局長」。吳得掂曾經話自己冇諗過做教育局局長，唔通佢早已係煙民，自知其身不正？
卓妮