以往立法會財務委員會（財會）都有議程調動嘅情況，但多數喺會期尾段先出現，以解決撥款申請大塞車嘅情況。不過，立法會只係復會一個星期，當中財會今個星期只係開第二次會議，就已經有議程被抽起喇！
上星期嘅財會進度緩慢，四個鐘頭會議中只完成到十個議程中嘅頭兩項，排第三就係律政司法律政策科嘅申請，將一個編外職位轉做常額職位，以負責政制及選舉事務相關職務，理論上會留待今個星期會議排第一項議程處理，但今個星期財會嘅最新議程中，呢個申請已經不翼而飛。
據了解，喺統計人數後發現，今個星期能夠出席會議嘅人數唔多，有機會導致呢項申請唔夠票通過，再加上呢個職位處理選舉事務，擔心畀咗平台泛民就取消候選人參選資格（DQ）問長問短，變相係財會拉布，所以就臨時決定抽起囉！