政情：財會副主席處子戰 陳振英做觀察員
立法會財務委員會尋日開會，未見火爆場面，新任副主席嘅金融界議員陳振英經歷咗風平浪靜嘅處子戰。陳振英全程坐喺主席陳健波（波哥）隔籬，雖然佢喺會上一句聲都冇出過，但就默默寫滿咗兩版紙，到底佢寫咗啲乜呢？
稱向波哥學嘢
陳振英事後自嘲做咗一整日「觀察員」，主力睇波哥主持會議外，就係幫手遞吓文件。佢話從波哥身上學到好多嘢，令佢行少好多冤枉路，例如對方教佢要記住啲議員係第幾次提問；又提醒議員要求政府事後補交資料，官員會自己記低，主席或代主席唔需要出手等等，咁多秘訣難怪佢寫滿兩版紙喇。
準備充足，莫非隨時可主持會議？陳振英自認仲未夠班，大把嘢要學，希望短期內唔使倉卒上陣喎。至於波哥之前大呻主持財委會搞到腰痛要用坐墊，陳振英話自己第一日做副主席，條腰暫時仲頂得順，不過遲吓腰痛的話，可能要請教埋波哥用邊隻坐墊喎。