中環出更：委員會冧友選舉後 麥美娟搶閘退出
立法會日前復會，十八個事務委員會同財務委員會轄下嘅兩個小組委員會嘅正、副主席選舉亦已結束。近年不論建制派定泛民都會「冧友」加入各事務委員會，以爭奪正、副主席寶座，但選舉之後就紛紛「退會」。尋日屬建制派嘅立法會議員麥美娟（Alice）就率先退會，退出咗財會轄下嘅人事編制小組委員會喇。
建制派同泛民一般都會就正、副主席人選進行協調，但由於早幾年泛民玩突襲，搞到建制派依家都唔放心，年年都照「冧友」，幾乎所有建制派議員一開波都要入晒各個委員會，確保喺各委員會取得主導權。
稱地區工作忙碌
過去唔少議員喺委員會選完正、副主席後都會退會，有見及此建制派都有要求議員唔好咁快退會住，要先交代有邊啲委員會係真係打算加入、有邊啲係將會退出同埋退出嘅次序。至於點解咁做？咪就係要確保委員會有足夠人數，防止出現唔夠票情況。
咁點解Alice會急急腳退會呢，唔通佢唔聽話？佢就解釋自己同其所屬嘅工聯會立法會議員已有分工，知道委員會內有同事喺度，加上地區工作忙碌，所以就先決定退出人事編制小組喇。
卓妮