政情：八網難逃：同月生日 古仔Greg蘇齊切蛋糕
商務及經濟發展局前局長蘇錦樑（Greg蘇）尋日喺社交網站貼咗多張相，其中有一張係佢同香港演藝人協會會長古天樂（古仔）齊齊切蛋糕。Greg蘇仲留言話兩人都係十月生日，好開心可以一齊慶祝。網民反應好受落，有人形容兩位係「男神」，生日快樂嘅祝福源源不絕添喇！
聯繫演藝界與工創空間協作
睇真啲個場地，係香港工業總會最近開辦嘅「INDEX工創空間」，Greg蘇曾經形容係佢同工總生嘅「BB」，唔知古仔上去做乜呢？Greg蘇就話，佢一向都希望協助聯繫唔同嘅業界同工創空間一齊協作，為香港創造更大價值，其中包括演藝人協會，雙方之前已傾談多次，希望新入行嘅藝人同該空間可以產生創意火花。
尋日古仔同該會副會長林家棟首次上去參觀，工總總裁何健華都喺度。Greg蘇話後來現場有人突然攞咗個生日蛋糕出嚟，話要為佢同古仔慶祝，形容係一個意外驚喜。