政情：今日你上鏡：金鈴買鞋 滿足欲望又行善

購物係女人嘅天性，香港湖北社團總會副會長金鈴亦唔例外。金鈴早前喺中環置地廣場與一名男子食晏，佢當日身穿藍色上衣襯紅色長褲，非常搶眼。金鈴飯後入咗附近一間時裝店，集中火力睇鞋，見佢唔使坐低，單腳企喺度換鞋，平衡力似乎相當唔錯。咁最後有冇收穫呢？佢就話，係專登抽時間過嚟，因為依家間舖頭唔只有特價，仲適逢做緊慈善活動，部分顧客嘅消費會作慈善用途，而佢就買咗兩對鞋，既滿足到購物欲望，又可以做善事咁話。聽落都好似幾精打細算喎。