政情：港交流生罷演 陳緯邦嘆有性格
菁英會副秘書長陳緯邦（Calvin）早前拎住個篋同背囊入沙田馬場，原來佢啱啱喺內地帶完交流團返香港，當日咁啱又有佢嘅愛駒出賽，所以點都要趕過嚟撐場。講開帶交流團，Calvin慨嘆依家嘅後生仔真係好有性格。究竟發生乜嘢事，令到佢咁感慨呢？
拒因文化差異換歌
過去多次帶隊交流嘅Calvin話，有次佢帶一班香港後生仔去內地交流，大會原本安排表演活動，交流生就幾個人一組表演唱歌，不過由於文化差異，佢哋就建議原本已經自行揀咗表演歌曲嘅香港交流生換歌，但係有香港交流生就拒絕換歌，仲呼籲埋其他香港交流生拒絕表演添，最後呢班香港交流生真係冇參與表演。
Calvin認為，年輕人去到外地交流，始終會有文化差異，加上去到人哋地方，希望大家抱着互相尊重嘅態度，學習唔同文化喎。