政情：楊潤雄自爆小學花名叫「豬膶」 曾被記過體罰見家長
唔少人細個都有古靈精怪嘅花名，教育局局長楊潤雄都唔例外，佢接受一個電台節目訪問時被問到該局前局長吳克儉畀人改花名，楊就自爆讀小學時都有花名，係同佢個「潤」字有關，仲話「讀過書嘅人都試過畀人改花名，人家要改點樣都會改到」。八卦之下原來楊嘅花名係「豬膶」，不過佢細個其實唔肥，只係有人咁樣叫過佢，之後就變成佢個花名喇。
嘆太多文件 睇唔切書
楊又講起自己讀小學時，因為喺唔適當嘅時候講嘢，試過被記過，當時學校有體罰，仲要見家長添。佢就話，人生係可以犯錯嘅，但一定要從中學習同改過喎。
講起吳克儉，楊就話當年兩人合作時，吳畀咗好大空間佢，相信對方係樂觀嘅人，離開政府應該唔會唔開心。對於吳曾經提過自己一個月睇三十本書，楊被問到閱讀數量時就話可能大家對閱讀嘅睇法有落差，又稱自己睇書好慢，唔計雜誌一年大概睇十幾本，依家太多文件要睇，更加係一年十本都未必睇得完咁話。