政情：田北辰 蔣麗芸 失落委員會正副主席
新立法會年度已展開，建制同泛民近日就開會討論協調立法會多個委員會嘅正副主席職位。最新結果係，實政圓桌田北辰繼早前唔再連任財務委員會副主席後，鐵路事宜小組委員會（鐵路小組）主席都唔獲建制派支持續任，據知係不滿佢做主席嘅表現。此外，新一年度嘅教育事務委員會主席將由泛民擔任，原本做主席嘅民建聯蔣麗芸（Ann）唔肯「降呢」做副主席，將交由黨友鄭泳舜接任。田、Ann二人都冇晒正副主席職位，唔知日後係咪更暢所欲言呢？
建制不滿表現 田批指控離譜
鐵路小組主席將會由航運交通界議員易志明接任，據知建制派內部不滿田北辰做主席嘅表現，認為田早前支持以特權法查沙中線，而鐵路小組又通過譴責運輸及房屋局局長陳帆嘅動議，認為田大可以運用主席權力，令到該次委員會唔使投票，所以認為田唔適合做主席。不過，建制派並非完全唔畀田做任何委員會嘅正副主席，舉例指，財委會副主席個位只係田自己放棄連任。
田接受查詢時直言建制派係「夾硬嚟講」，並逐一反駁。田話，當日決定唔做財委會副主席，係因為做副主席難以反對自己唔認同嘅撥款，又指做唔做鐵路小組主席，傳媒都會搵佢，「我嘅料人哋冇」，唔做主席仲可以入動議添，而以往做主席係因為覺得自己幫到手。雖然田冇得做鐵路小組主席，但佢就讚易志明係成熟同均真嘅人選。
對於建制派嘅指控，田就批評離譜，有關以特權法查沙中線方面，佢話事前摸底都有建制派議員想支持，只係有人後來轉軚。至於譴責陳帆方面，田直言憤怒，佢當時問咗兩次有冇議員要求響鐘，秘書處同佢講唔使問，泛民亦指摘佢點解要問，佢依然照問，只係響鐘後建制唔夠人反對，「如果咁都入我數，我覺得憤怒，做主席點可以唔move個動議」，即使陳帆事後都同佢講唔好意思。
Ann否認唔肯做副主席說法
至於被指唔肯「降呢」做教育事務委員會副主席嘅阿Ann，回覆時就否認唔肯做副主席，解釋自己已做過主席，所以做咩位置都冇所謂，而副主席只要係建制派議員擔任就可以，畀鄭泳舜試吓做副主席，訓練吓都好喎。