政情：遊泰騷腿癮發作 葉劉熱褲影相
騷腿並唔係少女嘅專利，現年六十八歲嘅行政會議成員兼立法會議員葉劉淑儀亦有一鋪騷腿癮，尋日喺網上就見到最新作品，正同女兒喺泰國清邁度假嘅佢以「上身蒸鬆糕，下身賣涼粉」嘅穿搭示人，身穿長袖恤衫，下半身就着條熱褲，加埋同一朵粉紅鮮花合照，莫非佢想表達與花爭艷嘅意思？
參加導賞團親近大自然
葉劉話自己參加咗酒店嘅自然導賞團，仲睇咗唔同種類嘅竹，又見到作為清邁主要建築材料之一嘅柚木，睇嚟佢對植物相當有興趣。或者着得後生，會勾起埋少女時代回憶，佢話諗起細個時成日去人稱「兵頭花園」嘅香港動植物公園，又話當時娛樂唔多，一片綠色園地就係好去處喎。
回想完少女時代，佢話發覺好多內地年輕人去泰國旅行，認為近年唔少人出外旅行嘅心態已經由瘋狂購物，變成享受清新空氣同綠色環境，難怪香港名牌商店林立嘅廣東道近年遊客數量大減咁話。