中環出更：想髮質變硬 何俊賢趁休會剃光頭
頭髮向來被稱為「煩惱絲」，漁農界立法會議員何俊賢（高佬賢）喺暑假就將頭髮剷到勁短，莫非佢有咩大煩惱？尋日喺沙田馬場見到佢，梗要追問吓，原來佢想「硬啲」，髮質硬啲呀！
高佬賢多年嚟都以飄逸留蔭男生短髮示人，但暑假期間突然風格急轉，剃到近乎剷青。佢笑笑口為剃頭解畫，原來佢早前撞傷頭皮，加上一直嫌髮質太柔軟，聽聞初生嬰兒剃光頭後新出嘅頭髮會硬啲，所以決定趁立法會休會，無乜公眾活動時剃光頭。
有人擔心佢健康出問題
不過人算不如天算，高佬賢諗住暑假剷青後匿埋，點知土地供應小組為漁農界召開嘅第二場土地諮詢大會，由九月中提前至九月初，佢惟有焗住以新髮型亮相。佢笑認有人擔心佢嘅身體健康出問題，但其實只係一場誤會啫。高佬賢又話自己啲頭髮生得算快，剷咗一個月左右，依家已經見唔到頭皮。照咁睇，等到立法會「開學」時，應該可以順眼啲喇！
卓妮