政情：沈豪傑撳住太太 免變怪獸家長
唔少家長都望子成龍，過分催谷子女而變成怪獸家長。元朗區議會主席沈豪傑就話自己以前讀書壓力唔大，希望將呢套應用喺囝囝身上，至於太太都明白佢嘅教育方式，所以撳住太太避免變成怪獸。
沈豪傑話，現時囝囝就讀嘅幼稚園，都係以學校同屋企距離作首要考慮條件，起碼囝囝同家長都唔使太辛苦。至於挑選小學時，佢就擔心只着重學校名氣，或者會令囝囝難以適應，所以要慢慢揀合適嘅小學，而且希望留空間畀囝囝自己探索，因為相信將來有好多可能性，毋須將囝囝框死。
應付面試 唔靠特訓
雖然開始計劃囝囝升小學事宜，但沈就認為唔需要安排特訓，因為個個小朋友都有一大疊證書，校長老師已經睇到慣晒，反而溝通技巧同埋面試表現先最重要，所以要帶多啲囝囝外出增廣見聞。