政情：陳振英角逐「財副」梁繼昌擺明挑機
立法會下月復會，其中掌握審批政府撥款大權嘅財務委員會將於本周五開會，選出新一個立法年度嘅正、副主席。據了解，被指係財委會主席未來接班人嘅金融界議員陳振英（Ronick），將會為接班做準備，角逐副主席一職，接替早喺今年七月休會前已經宣布放棄連任副主席嘅議員田北辰（田二少）。不過，有指泛民陣營嘅會計界議員梁繼昌（Kenneth）將會挑機，同Ronick爭奪副主席之位。
田二少早前因為要求引用《立法會（權力及特權）條例》調查港鐵沙中線問題而同建制派鬧不和，最後仲宣布唔會連任財委會副主席一職，造就財委會主席陳健波可以培訓接班人嘅契機。有資深建制派議員話，財委會主席一職係個燙手山芋，直選議員都唔願意接手，功能界別議員係較理想人選，所以屬意陳健波續任主席。但陳健波喺兩年後立法會換屆係咪連任仲係未知數，所以都應該為主席一職搵定接班人，而Ronick亦係理想人選，所以認為佢應該選副主席，等佢早啲熟習主持會議。
少作挑釁 泛民傾向接受陳
來自銀行界嘅Ronick唔止曾經幫議員開設內地銀行戶口，原來佢都幫過幾位泛民議員喺地區增設自動櫃員機，回應街坊訴求，加上當選以來都好少好似部分建制派議員咁挑釁民主派，所以泛民都傾向接受Ronick。不過，咁樣都唔代表Ronick接任副主席可以「坐定粒六」，皆因Kenneth已表明從政治角度，民主派一定要喺財委會擔當比較吃重嘅角色，所以點都要爭位，如果泛民陣營支持佢參選副主席，佢都會出選，但就形容Ronick係勤力、強勁嘅對手。
Ronick就話，如果建制派支持佢參選副主席，佢都好樂意，但就認為陳健波做主席咁勤力，副主席之位都唔係太重要，最多都係喺陳健波有事未能開會時，先幫手頂一頂。至於下屆係咪會接掌財委會，佢就話依家講呢樣嘢太早喎。究竟「財副」個位最後由邊個爭贏，周五自有分曉。