政情：今日你上鏡：陳國基願為慈善表演彈結他

特首辦主任陳國基尋日同一向鍾意唱歌嘅前高官楊立門一齊出席活動時，揸住把結他露兩手，佢哋仲講起有關音樂嘅話題。陳自爆細個時都鍾意玩音樂，學過彈結他，雖然當時手指好痛，但都堅持落去。講到好多後生仔學結他都係為咗追女仔，陳就笑稱自己唔係為追女仔，而係真心鍾意彈結他。雖然係咁，但陳入咗政府之後都冇公開表演過，佢話驚形象唔係咁好喎。不過如果係為慈善而表演，咁就唔同咁話。睇嚟慈善機構可以試吓請佢做神秘嘉賓喇。