政情：高鐵通車擇日 險撞正山竹
超強颱風山竹早排吹襲香港，喺本月十六日朝早，天文台發出十號颶風信號。呢個十號波搞到香港多區水浸兼處處冧樹，唔少大廈嘅玻璃幕牆都被吹到爆玻璃，幾乎將成個香港反轉。唔講唔知，原來港鐵內部曾經就高鐵香港段通車嘅日子睇通勝擇吉日，原本打算喺今個月十五日通車，即山竹來襲前夕。如果真係當日通車，翌日就撞正山竹殺到，實搞到大混亂，咁就實畀市民鬧爆係「衰日」喇！
好彩西九龍站玻璃冇爛
據悉，喺高鐵驗收合格之後，港鐵內部曾經就高鐵通車睇通勝擇日，希望可以擇個吉日通車。當時港鐵內部就打算揀本月十五日作為通車日，但唔知點解，政府最後就扑槌高鐵香港段喺本月二十三日通車。今次通車情況都已經混亂，如果加埋打風，真係不堪設想。
另外，山竹過後港鐵高層都即時巡查高鐵西九龍站，睇吓啲車站玻璃有冇事，好彩都冇穿冇爛，反而係港鐵位於九龍灣嘅總部大樓就有兩塊玻璃被山竹吹爛咗喇。