政情：教大校長張仁良 獲任交諮會主席
港府尋日刊憲，公布香港教育大學校長張仁良將出任交通諮詢委員會（交諮會）主席，任期兩年，下周一起生效，以接替已擔任交諮會主席六年嘅郭琳廣。運輸及房屋局發言人就話，深信喺張嘅領導之下，交諮會將繼續就交通議題向政府提供不偏不倚嘅意見。
接替郭琳廣
該局發言人又話，非常感謝郭琳廣於交諮會嘅六年時間中，處理咗多項重要同埋富挑戰性嘅交通議題，包括喺二○一四年向政府提交嘅《香港道路交通擠塞研究報告》。
資料顯示，任內帶領教大完成正名之旅嘅張仁良，於去年中獲教大校董會通過續任校長，新任期於本月一日先生效，為期五年，加埋尋日又獲政府委任接掌交諮會，相信張日後大把機會就教育同交通運輸政策向政府提供意見，甚至幫手「拆彈」，睇怕佢之後都會愈嚟愈忙喇。