政情:沙中線醜聞洶湧 陳帆被失蹤「避風」

超強颱風山竹早前襲港,令香港交通大癱瘓,但運輸及房屋局局長陳帆竟然冇咗影、玩失蹤,直到風暴過後成個星期、高鐵香港段通車,佢先至出來解畫,聲稱成個政府團隊由預警到懸掛風球夙夜不眠喎。不過,解畫唔夠一周,佢又要抖抖喇,今日開始休假三日,到下月二日先至返工。有傳佢頻頻匿埋,其實係因為沙中線工程醜聞爆不斷,有人就下令要「收埋」佢,以免火上加油,所以佢係「被失蹤」至啱!

陳帆休假期間,運房局副局長蘇偉文就要兼任埋局長工作,直至陳回任為止。原來陳帆玩失蹤係有原因,有立法會議員爆料,話早喺立法會休會放暑假之前,運房局都有問過議員暑假期間安排局長落區事宜。到暑假期間,議員再邀請陳落區時,就被告知只能夠安排蘇偉文落區。結果早前當局去元朗天榮站沉降現場視察,以及去港島西環邨聽取街坊重建該邨訴求都係由蘇代勞。究竟係乜嘢原因令當局轉軚,唔畀陳帆落區呢?

僅於社交網站發貼出相

事緣喺暑假前後,沙中線工程連環爆大鑊,唔係紅磡站石屎剝落、鋼筋外露,就係沉降問題處處,完全暴露出沙中線豆腐渣工程嘅醜陋。外界對陳窮追猛打,甚至要求陳下台,所以有人就落「柯打」叫陳「收埋」自己,唔好現身。搞到連山竹襲港,陳都只係喺幾日前先至鬼祟落區,到紅磡碼頭視察,仲要連當日嘅政府新聞公告都冇發放消息,只係喺當局社交網站專頁「運房點線面」發貼同上載陳視察嘅照片。而呢個專頁本身已經相當低調,發貼都唔多,睇怕都冇乜人知道。

唔知邊個話過「官到無求膽自大」呢?依家下屬失職就選擇臭屎密冚,等自己「安然度過」,個膽真係愈做愈縮,驚得咁緊要。運房局接受查詢時就否認陳帆係避見公眾,聲稱陳喺暑假期間工作繁重,分工合作之下就由蘇代表落區喎。

第一手消息請下載on.cc東網iPhone/iPad/Android/Windows Phone Apps