中環出更：樹根永續議辦 房署新招打擊
前立法會議員鍾樹根喺兩年前嘅換屆選舉中排名單第二出選，未能成功連任重返議會。原本樹根要交還位於柴灣漁灣邨嘅議員辦事處（議辦），但佢就喺換屆前將黨友、自動當選嘅進出口界議員黃定光個名加入議辦，結果被批評「永續辦事處」。不過，講咗一段時間嘅打擊以聯名名義霸住議辦嘅措施已經通過，會喺明年四月一日生效。
房屋署早喺去年向立法會轉達改善聯名議辦租賃安排建議，收集同整合議員意見後，就將修訂建議交畀房委會商業樓宇小組委員會討論，並喺上月會議中通過，但房屋署會以循序漸進方式推行，明年四月一日或以後收到嘅申請才會引用新措施，生效前所收到嘅申請仍會以現行租賃安排去處理。
連任失敗須交還
至於未來嘅聯名議辦租賃安排，會將承租人分為主租戶同附屬租戶，身份一經決定就不容調換，而且只能得一位主租戶，租約期間或續約時要加入其他附屬租戶，就只能由主租戶提出申請，而聯名議辦的租約期會同主租戶議員任期一致。就樹根嘅類似個案，若主租戶議員連任失敗，就要交還議辦。
卓妮