中環出更：李騰駿寄語年輕人肯守時已贏一半
年輕一代嘅時間觀念彷彿有「時差」，唔少年輕人無論係約會或者返工都總會遲到。從事青年工作多年、啱啱卸任和富領袖網絡督導委員會總監一職嘅李騰駿（Timmy）都話，依家啲年輕人習慣夜瞓，假如約佢哋朝早見面，往往都係「甩底」收場。佢仲講笑話，假如年輕人肯守時，甚至較原本約定嘅時間早到，單憑呢一點，相信都足夠擊敗一半同齡人。
Timmy喺委員會新一屆就職儀式時透露，佢哋嘅導師成日都畀後生仔「放飛機」，激到紮紮跳，久而久之，連Timmy都放棄喺朝早約年輕人見面，寧願將會面時間推遲。不過遷就唔代表退讓，佢話，假如有後生仔朝早都可以準時出席，甚至比佢哋早到，印象分就會非常高喇，坦言「好開始就係成功嘅一半」，對突圍而出非常有幫助咁話。
講到卸任之後有乜搞作，Timmy就話想多啲陪佢三歲嘅囡囡喎。講起湊女經，佢就話雖然坊間認為小朋友唔應該接觸電子產品，但佢每日都會畀囡囡玩一陣平板電腦，覺得喺呢個年代好難避免接觸喎。
而接任總監一職嘅方奕展就賣花讚花香，話佢哋有關青少年企業試工嘅計劃，並非如一般實習咁當實習生係廉價勞工，而係會畀實習生直接參與決策、提出建議。聽落好似會學到好多嘢咁噃。
李宗德話新一代父母太緊張
當日唔止有兩位新舊總監，負責該計劃嘅和富高級項目經理何仕明、和富社會企業會長李宗德、香港理工大學校長唐偉章等都在場。對於外界對後生仔有唔少批評，李就為新生代講好話，話新生代成長空間狹窄，好似佢細個嘅時候父母去咗返工，佢就會同朋友仔去沙灘，甚至瞓一晚都得。但依家嘅父母都好緊張，社會亦唔太容許小朋友自己一個周圍去，所以年長一輩如果用自己嗰套去衡量新生代係唔公平嘅。
卓妮