政情：梁健文迫遷屯門 做足五年農夫
樓價難以負擔係多代香港人嘅煩惱，不過以前嘅人選擇多啲，唔揀市區仲可以搬入新界。早前喺仁愛堂嘅活動上見到屯門區議會主席梁健文，原本佢一家人住喺廣東道唐樓嘅板間房，後來因業主加租，舉家搬到屯門居住，當時係一九七一年，屯門公路仲未落成，成個屯門只有一架由元朗開出往佐敦嘅巴士，嗰時啲人仲會問「屯門有冇牛？」
難忘打風屋頂漏水
梁健文話最初搬入屯門，由於只得一架巴士同青山公路連接九龍市區，所以佢留咗喺屯門耕田，做咗五年農夫。佢最深印象係每次打風，由於村屋嘅屋頂只係一張「蠟青（瀝青）氈」，防水唔防風，所以要放啲磚頭壓住佢，然後屋內就用水桶陣接住屋頂嘅漏水。
香港市民每逢打風都好興奮，皆因掛八號風球就有得放風假，不過對農民嚟講一場風暴就足夠令整年嘅心血化為烏有，所以梁健文直到今日都好怕打風，有颱風就好擔心農民嘅生計受損。