政情：爆登革熱期間休假 陳肇始英國買樓？

憲報顯示，陳肇始原定喺八月十八日至本月五日，將會休假及離港公幹，但其時香港登革熱爆到咁大鑊，陳肇始最終提早結束休假，新聞處亦出稿指，陳喺八月廿七日啟程出發去從化公幹。根據有關資料，原來陳肇始同日申報增持一個位於英國倫敦嘅出租物業，由佢同妹妹擁有。

聶德權港增持物業

本港樓價高到令基層市民難以負擔，陳肇始選擇增持英國物業，而政制及內地事務局局長聶德權嘅家人似乎鍾情香港樓，聶德權喺八月三十日申報增持一個位於深水埗嘅住宅，業權由家人擁有，作出租用途。佢較早前已申報持有五個分布香港、內地及外國的住宅，五個物業均申報與配偶擁有，或由配偶完全擁有，而今次則申報由家人擁有。

翻查資料，聶德權申報增持物業前一日，曾到訪前海並即日返港，而佢喺申報前約一星期就曾經到訪深水埗，包括區內社區組織同創意藝術中心，並與當區區議員會面。

有人增持，但有人就減持，財政司司長陳茂波（波叔）就申報太太喺八月二十四日簽咗合約賣出物業，此物業係佢太太喺澳洲雪梨全權擁有嘅一個住宅連一個車位及一個儲物格，作出租之用，而波叔係有關單位按揭貸款嘅聯席借款人，並無其他利益。唔知呢個舉動對大家投資物業有冇啲乜嘢啟示嘞！