中環出更：聯署反港獨 陳沛然致歉
政府喺本周一中秋節正日刊憲，禁止香港民族黨運作，搞到好多團體即日忙住出聲明，公開表達反港獨立場。而一向自稱係立法會中間派嘅醫學界議員陳沛然，竟然同立法會建制派議員發聯合聲明，齊撐政府取締民族黨，惹來業界強烈反彈。陳尋日喺網誌回應，話當日好倉促咁同意聯署，因而引起部分同業疑慮，深表歉意。
業內轟自稱中立又撐建制
公立醫院內科醫生同杏林覺醒成員黃任匡對陳沛然嘅聯署十分不滿，前晚喺社交網站發貼兼Tag埋陳沛然，鬧佢「唔出聲冇人話你啞o架喎」、「做乜衝出嚟陪元秋鼠王班友癲埋一份」、「說好的中間超人呢」。黃仲留言話，其實甚少醫生支持港獨或陳浩天，大家係嬲陳沛然做乜邊話自己中立，又衝出嚟簽建制派聯署，正所謂「少你一個唔少喇」。
陳沛然見業界反應「熱烈」，尋日傍晚突然喺網誌澄清，承認中秋節當日有建制中人搵佢聯署，反對民族黨及其港獨主張，而基於自己係反港獨，所以倉促咁同意聯署。佢又重申，定會竭力維護香港核心價值，同根據《基本法》賦予港人嘅各項權利和自由，今後會審慎監督政府喎。
卓妮