中環出更：三指鋼琴家黃愛恩音樂夢源自兒歌
做人無夢想同條鹹魚有咩分別？不過仍然有唔少年輕人對前途感到迷惘，更遑論談夢想。然而，夢想可能由身邊一件小事而來，好似「三指鋼琴家」黃愛恩嘅鋼琴夢就源自一首兒歌喇！
黃愛恩天生只得三隻手指，自幼開始接受多次手術，自言當時感到絕望，直至有次喺醫院聽到卡通片叮噹（現改稱多啦A夢）主題曲，覺得呢首歌訊息正面，好想學鋼琴彈出呢首歌，就為佢人生燃起希望。
現時教書嘅佢不時接觸年輕人，佢都大嘆有唔少學生無夢想，所以覺得作為老師，要傳遞知識外，亦都不能忽視生命教育喇。
尋日係「2018香港品格日」嘅開幕禮，活動由品格教育協會主辦，主席劉馬露明、其丈夫兼協會董事劉仲恒當然在場坐鎮，而民政事務局前常任秘書長李麗娟、正生書院校長陳兆焯、和富社會企業執行總監蔡德昇同太太李美辰等都有現身支持。
李麗娟就話，退休後主要從事青年義務工作，接觸唔少年輕人都覺得佢哋好樂觀，但都發現佢哋對置業有怨氣。佢話自己都要工作近廿年先上到車，但個人例子都唔適合今日嘅社會，所以政府要幫手之餘，發展商都應該多回饋社會，唔好只顧股東利益囉。
陳兆焯冀助隱青融入社會
陳兆焯就認為社會上有二萬至四萬個隱蔽青年，需要趁年輕拉番佢哋出嚟，但因為佢哋並無犯事冇理由入讀正生書院，所以籌備緊新寄宿學習計劃，喺出年九月開始接收呢群人喇！
卓妮