政情：八網難逃：貪靚着高踭鞋惹禍 林琳騷豬蹄

林琳睇完跌打之後，兩條小腿都要包上紗布。（互聯網圖片）

林琳早前喺Facebook上載咗張相，見佢兩條小腿都包咗紗布，變咗豬蹄。之但係拗柴又唔係呢個位吖，搞乜鬼呢？原來係舊患。佢貼文話呢幾年都着少咗高踭鞋，除咗因為唔再返銀行工，唔使着得咁正式之外，主要係因為喺上次選舉之後，兩隻腳嘅腳板底中間打橫條筋都扯住痛，所以近年都買咗好多波鞋着。

• 林琳（互聯網圖片）

紗布包到上小腿

點知有日朝早過中環開會，着番高踭鞋行同開車就發現又痛番，見下晝有少少時間就去咗睇跌打，點知師傅話要包住晒兩條小腿，就變咗咁。咪就係豬蹄囉！雖則係咁，佢都好識自我安慰，話包咗紗布嘅豬蹄配上高踭鞋，感覺都幾型喎。呢啲就叫做自我感覺良好嘞！