政情：今日你上鏡：梁栢賢中秋晒拖手相 閃過極光
欣賞極光唔止可以去芬蘭、冰島、挪威，加拿大黃刀鎮亦都係追極光嘅熱點。不過有乜嘢閃過極光？就係醫院管理局行政總裁梁栢賢（PY）喺社交網站嘅「放閃」相喇！
網民大讚有初戀感覺
相中兩人係手拖住手，PY仲留言話︰「三十多年未拍過拖手照！攝於黃刀鎮，中秋節快樂！」平淡嘅一句說話流露出無限甜蜜。
見到PY嘅「放閃」相，唔少網民都大讚相中景靚又浪漫，話佢哋好有大學生初戀感覺，又叫佢哋之後啲日子要拍多啲拖、拖多啲手，同埋影多啲拖手相。有人甚至話︰「唔係三十幾年未拖過手就得啦！三十幾年未拍過照冇問題，最緊要三十幾年，從未甩拖呀！」唔知PY之後會唔會「順應民意」，影啲拖手相「放閃」呢？