政情：白鴿黨雙牌頭風波 林卓廷否認隻手遮天
民主黨（白鴿黨）近日鬧出「雙牌頭」風波，該黨中委會上周決定將黨友、前西貢區議員柯耀林任主席嘅「將軍澳民生關注組」（關注組）定性為參政團體，柯正面對二揀一抉擇，政界有傳事件緣於該黨立法會議員林卓廷同樁腳不和，為未來嘅選舉安插親信有關。
「當然要維護莊榮輝」
林回應時重申，將關注組列為政治組織係由該黨中委會同選委會按機制共同決定，並非佢一人可以說了算。
林接受查詢時話，今次決定喺白鴿黨內已花大半年時間處理，強調一個人唔可以戴兩頂帽，關注組同該黨喺選舉上有嚴重衝突，「唔可以一邊嚟民主黨聽我哋開會，一邊幫關注組」，否則會引起尷尬。對於被指偏幫同關注組撞區嘅黨友莊榮輝，林稱「當然要維護佢（莊榮輝）」，又揚言若然柯耀林留喺白鴿黨，佢亦會維護柯嘅參選權。
對於被指同地區樁腳不和，甚至曾揚言下屆參選唔需要樁腳，林否認有講過以上言論，質疑有人造謠，更話如果對方有證據就應該攞出嚟，佢希望大家唔好再抹黑攻擊，各自做好地區工作。