政情：借旺角殺街還魂 議員重提設文化局
有十八年歷史嘅旺角行人專用區於上月初正式被「殺街」，為附近商戶同居民迎來片刻寧靜，但一眾街頭表演者「曲終人未散」，部分轉戰尖東海濱繼續夜夜笙歌。油尖旺區議會將喺聽日召開大會，建制同泛民議員各自入文件，要求當局正視街頭表演促引入規管制度，其中「殺街」主刀手、經民聯區議員陳少棠同黨友聯署，要求重新研究設立文化局。呢個局屬於上屆政府遺物，唔通今鋪可以借機還魂？
轟民政局文化科冇成效
根據區議會文件，經民聯四名區議員包括陳少棠、黃建新、莊永燦同身兼區議會副主席嘅黃舒明聯署，指旺角殺街的確解決咗區內噪音問題，但遺下街頭表演規管未處理，要求政府解畫。陳少棠話區議會係要求政府做好街道管理，令街頭表演可以喺唔擾民嘅情況下繼續生存，但政府好似無乜反應，班表演者仲轉場去埋尖沙咀，證明當局唔可以再逃避規管問題。佢更炮轟政府處理問題龜縮覺得好唔滿意，話民政局內有文化科，但明顯係工作無成效，先搞出西洋菜街嘅十八年慘痛經驗，所以設立文化局賦權畀政府做更多工作。
同時，公民黨區議員余德寶、民主黨立法會議員兼區議員涂謹申及報稱獨立嘅區議員林健文亦有提聯署文件，佢哋就只係要求政府設立專責文化部門，研究街頭表演政策，引入規管制度，甚至發牌。余德寶解釋，對於成立文化局持開放態度，但認為開設一個新政制局需時長，而表演者係好即興，今日鍾意去呢度，聽日又去另一度，應該搵相關文化權威人士立即組成專責小組，盡快處理規管問題。
梁美芬贊成 想動議討論
經民聯立法會議員梁美芬就話好贊成開設文化局，記得七、八年前喺立法會曾討論有關事宜，建制同泛民都支持，但後尾由政府提出架構重組時，泛民又拉死咗。佢又話街頭表演唔係噪音，唔係街上嘅山頭文化，係真真正正嘅藝術表演，再加上西九文化區將來會搞好多唔同大型文化活動，認為係時候再討論成立文化局，復會後會同政府部門會面，甚至動議相關事務委員會討論跟進。
近年的確愈嚟愈多人關注同參加文化活動，但現有政府部門係唔係唔足夠管理呢？抑或係根本懶得理？答案就不得而知嘞！不過，政府早排放風話想將運輸及房屋局分拆，依家區議會同有立法會議員都話要開多個文化局，睇嚟政制及內地事務局局長聶德權有排頭痕喇！