中環出更：立會又有人大肚 今次係鄭泳舜
繼新民黨嘅立法會議員容海恩有咗BB之後，立法會又多咗個大肚議員喎。邊個有喜？
眾所周知，立法會議員鄭泳舜（Vincent）鍾意運動，仲玩埋三項鐵人賽添，身形fit到爆，但Vincent尋日出席佢喺大坑東邨嘅辦事處開幕禮時，就凸咗個小肚腩出嚟喎。睇真啲，佢真係明顯肥咗添！嘩，發生咗乜嘢事呀？
高峰期肥咗廿幾磅
Vincent就話做咗議員約半年，實在太忙，日日都要坐喺度做嘢，朝九晚七都係坐，相比以前咁大嘅運動量，依家真係少咗好多時間做運動，選完之後，最高峰時期係肥咗廿幾磅，依家已經食少啲，減番十磅，着西裝終於鬆番啲嘞！
佢又話今個禮拜都有三項鐵人比賽，但因為肥咗，依家真係好慢，好似悠遊組咁，嚟緊仲會參加渡海泳，之前有日要水試，即係游千五米，自己以前都游得幾快，依家就不斷被人爬頭咁話。睇嚟做議員真係會犧牲啲嘢，包括健康同身形。
卓妮