中環出更：細個學喇叭吹口琴 李應生冇試過彈結他追女仔
上一代嘅家庭資源較為緊絀，並唔係太多人有機會學習樂器，唔似現今一代學生咁幸福，有得接觸音樂之餘，唔少更擅長多過一種樂器。不過，無學過樂器並唔代表唔會欣賞音樂，卓妮早前就喺文化中心捕捉到唔少名人去睇音樂會，當中唔少無玩過音樂添！
早排中華總商會同九龍社團聯會，同一日內分別喺文化中心邀請咗民俗樂團同管弦樂團演出，難怪唔少名人齊齊現身文化中心，好似有中華總商會永遠榮譽會長霍震寰同副會長李應生、海上絲綢之路協會名譽會長姚祖輝、九龍社團聯會顧問鄧銘心等。
李應生讀書時有玩過步操樂隊，一路吹奏樂器一路步操，聽落都幾有難度。佢就話好彩有玩開制服團體，所以步操就難唔到佢，更教路步操時最重要係留意鼓手嘅節奏喇！佢當年學習喇叭同口琴，但用手彈嘅樂器就唔太擅長，所以無試過彈結他追女仔，強調係用真心誠意去打動太太。
霍震寰就自言無乜音樂天分，睇嚟佢嘅天分去晒運動度喎，但佢嘅下一代都有畀佢哋接觸樂器，但就無話要催谷佢哋，因為認為有興趣就會自發去練習，畀佢哋自由發揮仲好。而姚祖輝就因為年幼缺資源無得學樂器，所以現時有能力都會畀下一代去玩音樂，不過佢就話運動發展都唔能夠忽略，因為可以培養體育精神。
鄧銘心唔介意囝囝做BAND仔
本身係工程師嘅鄧銘心讀書時就只顧畫畫未有學習樂器，但現時一對仔女都有學樂器，不過囡囡只係學過一段時間鋼琴，見佢唔太鍾意就由佢。相反，十一歲嘅囝囝就學緊打鼓，間唔中更同丈夫彈結他合奏添，鄧銘心明言唔介意囝囝將來做BAND仔，好開通喎。
卓妮