政情:白鴿內訌阿廷疑為安插親信踢走柯耀林

民主黨(白鴿黨)多年來不斷爆出內訌,經常出現新舊派系之爭。最新鬧出禁止雙牌頭風波,該黨中委會上周決定把「將軍澳民生關注組」定性為參政團體,令該黨新界東社區主任、關注組主席柯耀林面對二揀一,隨時帶埋一班兄弟齊齊退黨。不過,有傳事件真正原因非撞區,而係該黨新東立法會議員林卓廷(阿廷)同樁腳不和,為明後兩年選舉安插親信鬧事惹出禍,更有人透露撞區「洽商」過程,直指阿廷夾硬製造撞區力保自己友出戰。根本又係內部鬼打鬼喇!

白鴿黨喺新界東一直風雨飄搖,多年來屢爆退黨潮,由該黨前主席劉慧卿(卿姐)喺一六年退下火線,將新東立法會議員一席交由阿廷接棒後,新東局勢長期不穩。有白鴿黨中人透露,阿廷與樁腳不和係公開秘密,好多人不滿阿廷口沒遮攔,態度高傲,喺立法會選舉勝出後曾揚言「我下屆參選唔需要樁腳」,為新東亂局埋下伏線。有其他地區支部成員大嘆,唔係卿姐睇,阿廷人緣又唔係幾好,更難服眾。

據了解,關注組同阿廷嘅親信撞區只有三區,包括將軍澳厚德、善明,以及引爆雙牌頭風波嘅都善選區。有消息人士指出,阿廷聲稱會出戰厚德同善明嘅人選均無落區,只係「做個樣、填個名」,真正出戰只有關注組成員、區內業委會副主席李柏棠,同連續四屆落敗區選、由港島空降新東嘅白鴿黨員莊榮輝都有意出戰嘅都善選區。

莊榮輝落區 撻朵惹反彈

據悉,莊榮輝試過落區爭取地區人士支持,可惜講唔掂數,莊就豪言「我係民主黨派落嚟嘅」,引起地區反彈,促使阿廷出手力保出戰。消息指,白鴿黨西貢黨團上月召開會議,討論柯耀林有意出戰的選區,當天阿廷私下跟柯耀林「講數」,講明唔好搞莊榮輝,其他區讓晒畀關注組。消息流出即引起黨中人質疑,阿廷自行製造撞區假象,打算借啲意逼走李柏棠,豈料對方與業委會企硬未能得逞,終變為夾走關注組。

掀退黨潮 贏粒糖輸間廠

唔少黨中人都笑稱,莊榮輝係唯一同阿廷夾得到嘅人,而目前該黨新東樁腳多係前綫派系出身,如掀退黨潮即削弱白鴿黨新東勢力,長遠影響立法會換屆選舉,絕對係牽一髮而動全身。而且李柏棠係業委會副主席,就算最後唔參選,都唔一定會支持莊榮輝,今鋪隨時贏粒糖,輸間廠嘞!

第一手消息請下載on.cc東網iPhone/iPad/Android/Windows Phone Apps