政情：馬逢國轉造型 連掃幾副眼鏡
暑假剛過去，唔少立法會議員已經外遊「叉電」完畢，返港工作。體育、演藝、文化及出版界立法會議員馬逢國早前以新造型示人，不過「髮Gel」不離身嘅佢並非變換髮型，而係換咗新眼鏡，一改幾年嚟嘅形象，以新造型迎接新一個立法年度。
馬逢國嘅銀色、近長方形嘅舊眼鏡已經戴咗幾年，最近就見佢戴咗副黑色鵝蛋形嘅新眼鏡。佢話，換眼鏡係同早排入場睇比賽有關。唔通佢睇比賽時食波餅？定係賽果太意外而大跌眼鏡呢？佢就話唔係，只係喺觀賞比賽期間舊眼鏡鼻樑位置突然裂開，所以先逼住要換。不過佢戴住呢副新眼鏡就望落潮咗，趁機會轉下新形象都係好事。
稱以備不同場合之需
佢又話，趁換開新眼鏡就大手入多五、六副，以備不時之需，仲可以因應唔同場合同活動去佩戴咁話，真係估唔到佢都幾貪靚。佢就解釋其實新眼鏡係以用途為主，健身同游水都有唔同眼鏡，估唔到佢唔止髮型，就連眼鏡都咁講究。