政情：佔中四周年前夕戴耀廷推港獨公投

戴耀廷曾於今年三月喺台灣出席論壇時，聲言香港等地人民應思考成為「獨立國家」或組聯邦政府，事後遭到各界狂轟公然「播獨」，事隔半年，戴耀廷尋日突然又主動觸及港獨議題。

詭辯討論港獨測試言論自由

戴於電台訪問中話，自己由佔中至今，從社運新手到依家有相當經驗，無論講乜嘢都會被視為港獨分子。佢近期就特登寫咗十篇有關港獨嘅文章，從唔同角度去探討港獨，強調大家係有權去討論港獨，仲話「能夠繼續講港獨呢個議題，其實係香港言論自由嘅測試點。」佢又認為，若然唔能夠討論港獨嘅可行性，就證明香港言論自由已經被收窄。

戴一係唔講，一講就意猶未盡，佢仲以外國為例，話當地舉行公投之後，獨立運動就有所收斂，所以佢認為最有效消除港獨嘅方法就係搞港獨公投，呢個公投唔使有法律效力，只要有公信力嘅程序，民間都可以搞咁話。但佢聲稱，相信大部分香港人都反對港獨，所以公投後港獨聲音就會「收聲」。

下周赴歐擬對港務說三道四

其實戴似乎有鋪搞公投癮，因為喺二○一四年香港討論緊政制改革時，當時佢就同港大民意研究計劃一齊搞「六二二民間公投」，叫市民就佢哋提供嘅幾個普選特首方案投票。結果政改就毫無寸進得個吉。今次佢又話要就港獨搞公投，真係唔知仲有邊個會睬佢。

同樣值得關注嘅係，戴耀廷又準備離港「說三道四」，佢自爆將會喺下周到歐洲出席有關香港自由問題嘅論壇，講述香港嘅民主狀況，演講題目雖然冇包括港獨，但就可能會涉及香港能否討論港獨嘅議題，由此觀之，戴似乎對港獨呢個議題真係情有獨鍾喇。