中環出更：推廣涼果入饌王柏源最愛話梅龍蝦伊麵
煮餸想走出傳統框框又好味，一啲都唔簡單。早前喺香港食品委員會（委員會）嘅周年晚宴上，見到身兼委員會副主席嘅百年涼果品牌第四代傳人王柏源（Leslie），佢笑稱自細就鍾意煮餸，後來長大讀書時心諗，涼果咁好味，點解唔用嚟煮埋餸呢？於是就開始研究涼果入饌，覺得最好食係話梅龍蝦伊麵喎。
Leslie係法國國際美食會藍帶卓越之星，廚藝自然有番咁上下。佢話細個經常去屋企嘅涼果舖頭玩，當時有請大師傅日日煮幾圍餸畀夥計食，佢就成日入廚房睇，所以自細鍾意煮嘢，後來佢嘗試用金桔炒飯，個個都話好食，於是就開始做實驗咁研究用涼果煮餸，包括冬薑煮鮑魚、杏脯煮牛扒同加應子炒餸等。經過五、六年不停試，佢終於寫咗本食譜，教人以涼果入饌。佢最鍾意用話梅煮蝦，仲話「話梅龍蝦伊麵」最正。連香港玉器批發零售商協會會長陳榮欣都好欣賞佢嘅創意，而佢自己就最愛食話梅豬手咁話。
梁玄博呻食油生意難做
委員會主席陳建年、會長李歡、香港中華出入口商會榮譽會長莊成鑫，同埋食油集團高層梁玄博（Joseph）都有到場。同Joseph講開食油，佢話香港人食得最多嘅係花生油，因為炒得香啲。佢哋嘅花生主要來自美國及山東，但因為中美貿易戰而被徵收兩成五關稅，最慘係唔敢輕言加價。
陳建年聽完都感慨生意難做，所以當晚特別頒發多個獎項以鼓勵業界，其中以生產甜醋聞名嘅食品集團第二代掌舵人伍錦康就獲頒「卓越成就獎」。
卓妮