政情：今日你上鏡：政總附近徘徊 張炳良重返熱廚房？

運輸及房屋局前局長張炳良近日喺政府總部嘅天橋出現，仲要撳電話撳咗一段時間添，唔通佢重返熱廚房？原來佢要去開檢討自資專上教育專責小組嘅會議，佢喺舊年開始做該小組主席，話諮詢剛剛結束，年底要交報告，時間都有啲趕o架，一定會有意見分歧，希望盡力做啦！佢又話依家每個月都會返政總一次開會，同以前最大嘅分別，就係依家要攞證才能入去喎。