政情:港大畢業生議會 向張翔開工作清單

香港大學校長張翔今年七月喺爭議聲中上任,其未來工作備受關注。香港大學畢業生議會早前訪問咗八百九十九名成員,包括歷屆校友同教員,了解佢哋認為新任港大校長應集中同首要處理邊啲工作範疇,該會主席潘燊昌、大學事務委員會召集人傅景華尋日公布結果。調查以五分為最重要、一分為完全不重要,當中「維護大學核心價值和捍衞大學利益」得分最高,有四點七九分,隨後為「捍衞大學自主」同「提升大學卓越研究成就」,分別有四點六一同四點二一分,最低分係「與內地大學合作」,僅二點四四分。

張認同調查結果

潘、傅尋日就調查與張翔會面,指張翔認同調查結果,會致力捍衞言論自由、學術自由、學術自主等,惟問及張翔上任前曾稱學術自由並非無界限,以及港獨應受法律限制,呢啲言論係咪同調查結果相違時,潘、傅指張翔有多年教學經驗,相信佢能帶領大學發展,做到應有嘅責任。佢哋又話喺會面期間冇提及港獨,而該會對港獨冇既定立場,強調如有會員提出就港獨作調查,該會將會配合,但目前未聽到呢方面嘅聲音。

第一手消息請下載on.cc東網iPhone/iPad/Android/Windows Phone Apps