中環出更：爸爸獲贈名畫楊華勇笑稱自己唔識嘢
香港成日被形容係文化沙漠，不過喺車水馬龍嘅觀塘工廠區，香港福建社團聯會榮譽顧問楊孫西嘅自家會所就經常有名人雅士出沒。早前佢喺會所舉行書畫展，展出三位資深畫家何洵瑤、鄭少忠同吳樵六嘅畫作，其中過半數係今年五月去楊孫西家鄉福建武夷山寫生嘅作品，佢哋仲罕有合力完成幾幅畫，令當地嘅採茶風情活靈活現。楊孫西對畫作愛不釋手，但佢個仔楊華勇就笑稱自己唔識嘢喎。
楊孫西話，香港畫壇臥虎藏龍，好欣賞三位壯年畫家，其中何洵瑤同鄭少忠都係被譽為「嶺南畫派最後一位大師」楊善深嘅徒弟。今年五月採茶季節，特意安排三人一齊去武夷山，一邊旅遊一邊寫生。佢形容今次嘅創作價值連城，事關三人用三支畫筆共同完成《武夷採茶圖》同《武夷之歌》送畀佢，笑稱咩價錢都唔會賣。
楊華勇當日都在場，佢就笑稱自己唔識畫畫，來自爸爸嘅遺傳係飲茶同埋酒。講起飲茶，佢又自爆屋企雪櫃經常有冰凍嘅大紅袍，可以攞嚟當汽水飲。不過見佢講到吞吞吐吐，好似做錯嘢咁，原來係驚畀識茶之人知道咗，會話佢唔啱喎。
鄭少忠自細愛畫畫 牆身滿塗鴉
當日嘅開幕儀式仲有好多藝術愛好者去捧場，包括中國香港名家書畫會主席賴榮春，因為鄭同吳都係佢喺香港中文大學學畫嘅老師。
賴又話，學咗兩個學期之後好有得着，例如筆同墨嘅把控掌握得好啲。鄭就話，畫畫係有技巧嘅，一定要重複去體驗、嘗試，用時間浸淫，佢自細就鍾意畫畫，屋企牆身都係佢的塗鴉咁話。
卓妮