政情：謝偉銓分飾五角 力撐海濱換地
鰂魚涌海裕街一幅地皮原址換地，用途由工業變成商業及零售項目，結果惹嚟「官商勾結」嘅質疑。身兼海濱事務委員會委員嘅立法會建築、測量、都市規劃及園境界議員謝偉銓（Tony）就力撐原址換地，尋日拍片講點解支持，段片最吸睛嘅係佢一人分飾五角。
Tony喺片中話，原址換地係各方協商成果，咁有邊啲人先？Tony一開始着白色恤衫加條藍色呔，再配以藍色西裝外套，扮演海濱事務委員會委員；除低件西裝外套就變身發展局官員，再剝埋條呔就係區議員，着番件反光安全背心又變成發展商。反而扮演居民就最有「誠意」，至少係換過件Polo恤嘛。
激動否認官商勾結
為咗撐海濱換地，Tony仲罕有激昂地將一份文件拍落枱，不過就笑笑口，扮激啫。佢話發展商換地係跟足相關程序，按市價計算補足地價，唔存在官商勾結咁話。民主派議員喺立法會拍枱宣洩不滿就見得多，Tony驚唔驚拍枱拍上癮，日後喺議事堂跟手拍埋一份o架？