政情：寫錯香港是國家 青民致歉
民建聯作為建制陣營，多次表態反對「港獨」，指「港獨」違反國家憲法同《基本法》，唔會有出路。不過青年民建聯（青民）尋日發表「香港青年創業意向調查及建議書」嘅文件時，竟然將香港寫成為一個「國家」，旋即惹嚟青民係咪支持港獨嘅質疑。
惹支持港獨質疑
文件中有關「提升金融產品對於初創企業的支持」呢一段，劈頭第一句就係「香港是一個市場經濟發達的國家」，擺到明將香港形容為一個國家喎，立刻惹嚟熱議。青民主席顏汶羽（Frankie）接受查詢時立刻認衰道歉，話係手民之誤，對引嚟外界質疑同埋對所有受影響嘅人致歉，又話多謝市民提醒錯字，仲即刻以「城市」字眼取代。
其實文件其他地方都以「城市」嚟形容香港，唯獨出事一段用咗「國家」，Frankie下次真係要金睛火眼睇清楚，唔好再變「港獨」分子啦。