政情：民協推區會撤授權票 屯門頭炮打唔響

全港十八個區議會中，仍有十二個區議會設有授權票。民協早前聯同民主派政黨及獨立友好發起全港聯署行動，要求廢除授權票。屯門區議會於前日（11日）舉行大會，係公布行動後各區中最先召開會議嘅區會，民協屯門區議員甄紹南於是「打頭炮」，先入文件討論及提動議，但係區議會文件及議程就遲遲未見有關議題。

甄紹南話，其實一早已入文件，不過區會秘書處話，主席梁健文經考慮後，覺得要先經財務、行政及宣傳委員會討論，再決定上唔上大會喎。佢又引述秘書稱，該委員會職能包括處理議事規則，所以適合討論相關議程。佢試過提出反對都冇用，搞到依家要到十月先有得傾。

民主黨稱支持又冇簽名

睇番份文件，只有甄及工黨區議員譚駿賢聯署，未見有白鴿黨嘅區議員。白鴿黨區議員何杏梅回覆時笑指，只係冇簽名啫，該黨區議員都會支持取消授權制嘅。由於屯門區議會出師不利，今日開會嘅葵青區會就變成首個討論取消授權票嘅區會，黃潤達話預咗失敗，但原則好重要，始終授權票係不民主制度。

反斥建制派圖淡化議題

民協主席施德來否認係出師不利，反斥責屯門區議會建制派試圖淡化議題，想拖到換屆都唔傾。佢又話，今次更睇到區議會秘書處附屬民政處嘅問題，質疑秘書處同民政專員甚至建制派傾過，先安排落委員會傾，呼籲建制派唔好搞咁多小動作。

查實行動開初係想複製深水埗區議會成功「偷雞」嘅經驗，但係各區似乎未做就打定輸數，白鴿黨更係明顯冇出盡全力幫手。唔通係該黨立法會新界西議員尹兆堅冇落柯打，幾位黨友就慳力啲，費事幫民協抬轎？頭炮打唔響，如果葵青又輸咗，就真係有頭威冇尾陣嘞！