中環出更：長跑揀號碼布李慧詩鍾情937
跑手嘅號碼布就好似車牌一樣，有機會的話，好多人都會選擇一組心儀嘅數字。聯合國兒童基金香港委員會今年十一月將舉行慈善長跑，尋日特登開放一百五十個名額，容許跑手以先到先得嘅形式揀選號碼布數字。有「牛下女車神」稱號嘅單車運動員李慧詩就揀咗「937」，原來係佢住喺牛頭角下邨嘅單位門牌。
李慧詩話，由於要應付繁重嘅訓練，所以佢甚少返屋企，直至牛頭角下邨清拆前夕，亦無法返去見最後一面。不過佢同牛下嘅緣分未完，後來佢獲體育學院分配房間，門牌號碼竟然又係「937」。李慧詩覺得呢組數字見證佢嘅經歷同成長，注定係號碼布上嘅心水數字。
劍擊運動員林衍聰揀嘅「823」更加意義深遠。因為今年八月廿三日佢喺亞運會奪得一面銅牌，女友又答應下嫁。儘管好事成雙，但係佢亦因傷患困擾，同日決定退役，「823」就成為佢踏入人生另一階段嘅數字。而林衍聰嘅妹妹、同樣都係劍擊運動員嘅林衍蕙，就選擇「084」，因為佢係○八年四月正式開始全職運動員嘅生涯。
水哥選「100」自勉完成百場賽事
講起長跑活動，當然唔少得人稱「水哥」嘅長跑達人張樹槐啦。水哥笑稱自己並非白馬王子，不過跑夠一百場馬拉松賽事，繼而封為「百馬王子」就有可能。佢已完成七十二場馬拉松賽事，預計未來三年跑多廿八場全馬賽事就可達標，所以佢揀咗「100」呢個數字來勉勵自己。佢正計劃去津巴布韋跑馬拉松，完成嘅話，就湊夠由英文字母開首A嘅雅典，一路跑至Z嘅津巴布韋喇！
卓妮