商務及經濟發展局常任秘書長利敏貞早前一身鳳袍出席記者會，引起網民熱議，就連局長邱騰華都大讚佢「有fashion sense」。利敏貞尋日出席香港中華出入口商會嘅酒會，唔着鳳袍，着咗一條黑底紅綠花裙，外襯一件黑色大褸。被問到外界好留意佢嘅衣着，佢就笑住答「哎呀，唔講呢啲嘢啦，你叫我講中美貿易戰就話啫！」睇嚟利敏貞都係事業為重呀吓，咁又係嘅，外界未留意佢嘅衣着前，佢最出名就係處理電視牌照一事，真係有料到㗎！
