政情：梁卓偉緊張收生 否認做公關
港大醫學院院長梁卓偉早前同一班文憑試成績優異嘅學生一齊見記者，被外界質疑其做法。梁卓偉尋日出席一個節目時，講起自己緊張收生，因為收生等同每年嘅投票，對於被指同班學生一齊見傳媒係「做公關」，佢就指如果自己真係要「做公關」，係咪應該話畀人聽，近日征服全球最高峰珠穆朗瑪峰嘅最年輕港人，係港大醫學院一年級學生。
百分百信任新校長 非盲目遵循
港大新校長張翔獲委任時備受爭議，有傳梁卓偉曾經遴選校長最終落敗，被問到係咪信任張翔，梁卓偉指百分百信任，但並非盲目遵循領導心態，而係希望能夠領導大家去發揮最多潛能，又話校長只係嚟咗兩個月，大家要公平、畀時間，校長都同大家講係一個新鮮人。
「雙非」衝急症室產子，曾經嚴重困擾香港。梁卓偉其時擔任食物及衞生局副局長，被問到任內發生雙非等問題係咪無可避免時，佢話「雙非」喺法律上到今日都無一條係可以引用嚟執法，只係大家依家自律咗，雙非並非醫療問題，反問「雙非你估佢嚟，係因為我哋嘅接生服務好吖，抑或你覺得係一個入境事務處、身份證嘅問題呢，我相信呢個不言而喻」，當年佢亦同相關部門講「呢個唔關我事」。