政情：陳健民預咗入獄 擬提早退休棄教職
二○一四年九月底爆發違法佔領行動（佔中），而佔中發起人之一、中文大學社會學系副教授陳健民，連同其餘八人被控告煽惑他人作出公眾妨擾等罪共六項罪名，案件將會喺今年十一月開審，預計明年初就會有判決。而佢接受傳媒查詢時就打定輸數，透露計劃提早退休面對審訊及準備入獄喇！
陳健民獲中大終身聘用，但明年初就會年滿六十歲退休年齡。而違法佔領行動四周年將至，佢就喺呢個時間向傳媒表示，有機會因為入獄以致無法任教下學期嘅課程，目前自己有申請免薪長假同提早退休兩個選擇，不過考慮到審訊有結果時已經到達退休之齡，認為提早退休會係較佳嘅選擇。
自爆要提早適應獄中生活
其實佢唔係依家先打定輸數，佢早就自爆要提早適應獄中生活，例如近年已經習慣唔開冷氣，亦曾試過瞓地板，佢最終命運如何，仲有幾個月就揭盅。