政情：插手民青 峯鴿博解凍黨籍 衰咗
民主黨（白鴿黨）立法會議員許智峯（峯鴿）喺今年四月，涉強搶保安局女行政主任（EO）嘅手機，及後被凍結黨籍。事隔數月，峯鴿突然扮無事向黨提出想「解凍」，以角逐因民主青年（民青）前主席洪寶華退黨而懸空嘅主席一職。不過，民青就無打算搞補選，至年底換屆前由副主席區鎮樺任代主席；白鴿黨主席兼中委會主席胡志偉更斬釘截鐵，講明中委會今個月無議程傾峯鴿黨籍喎。
話說四月爆出涉搶手機事件，白鴿黨形象插水，為補鑊急凍結峯鴿黨籍，黨內的紀律聆訊委員會更成立三人小組負責調查，不過礙於證據有限，小組決定無限期押後聆訊至司法程序完結為止。峯鴿事後繼續做地區同議會工作，間中去警署報到，睇落好似無事發生過咁。
胡志偉：無議程傾黨籍
至上月初，洪寶華因不滿白鴿黨「大佬文化」憤而退黨。峯鴿似係睇中機會，向黨中人表心迹話有意角逐民青主席，佢回覆查詢時承認此事，話早前有非正式口頭講過相關意願，但其實民青喺一六年換屆時已想選主席，只係見洪寶華好有毅力先無選。至於「解凍」黨籍，峯鴿就話已無參與中委會工作，會交畀黨決定。但胡志偉回覆時強調，點樣處理峯鴿嘅黨籍，一早已交代清楚，而今個月嘅中委會會議亦無相關議程。
區鎮樺就話民青將喺十一月舉行會員大會，由洪辭任到換屆選舉，時間不足三個月，常委會已決定唔搞補選，而佢暫未接獲任何人通知有意角逐主席。咁係咪要有白鴿黨籍先可以選？區解釋，所有民青會員可任常委，但主席則必須有白鴿黨籍，按佢理解峯鴿必先「解凍」方可參選。
民青欲改革 憂遭拖累
另有民青成員就話峯鴿明顯試水溫，睇吓黨內外對「解凍」有乜嘢反應，就算真係選都未必成功。該成員又話，如果峯鴿好想做民青，一六年可以做常委，明顯係當選立法會無時間，咁呢兩年都無乜做過會務，難以服眾，加上洪寶華辭任，民青要檢視定位做改革，擔心峯鴿喺黨內外嘅阻力，反過來拖累民青。
查實白鴿黨年底都換屆搞會員大會，峯鴿繼續安守本分，時機到好易「解凍」，反之依家諗住博大霧，胡志偉唔鬆口，民青又唔補選，睇怕過晒啲會員大會都搞唔掂，年內「解凍」危危乎！