中環出更：沙士黑暗日子 劉健華難忘業界被歧視
全球最大嘅香港鐘表展早前喺會展舉行，又係業界趁機歡聚嘅開心時刻。香港表廠商會名譽會長劉健華（Kevin）都有到場，佢見鐘錶展人頭湧湧，仲係全球最大嘅錶展，不期然想起當年嘅黑暗日子。
乜嘢黑暗日子？Kevin係話諗起沙士爆發嗰年，佢做緊表廠商會會長，當時有份帶隊去瑞士巴塞爾參展，結果香港行家受盡歧視，只准去買錶嘅地方，但賣錶嘅地方就唔去得，後來貿發局就拉隊提早返港，嗰段艱難嘅日子好難忘。
林健鋒儲落幾十隻錶
同場仲有貿發局副總裁周啟良、香港鐘表業總會永遠名譽顧問孫秉樞、會董徐珊雯等人。新加坡鐘錶業公會副會長梁兆權（William）都帶埋一對仔女同行家歡聚，卓妮見孫秉樞好專心喺度研究William戴緊嘅閃閃鑽錶，原來佢係想同William買一隻手錶，仲笑稱係買「玩具」喎！
行政會議成員兼立法會議員林健鋒（Jeffrey）都有出席交流晚宴，佢家族做玩具，自然儲咗好多玩具，原來佢都鍾意收藏手錶，收收埋埋都有幾十隻。咪以為佢只買貴價錶，其實淨係某個以潮流膠錶聞名嘅瑞士錶都有幾十隻。佢仲教路話去巴西呢類治安較差嘅地方就會戴膠錶。
Jeffrey笑笑口話雖然屋企有咁多錶，但係經常戴嘅來來去去都係嗰兩、三隻，當日佢就戴住某個名錶品牌。講起去治安差嘅地方要戴膠錶，好多人都話返內地唔好穿戴太貴重嘅飾物，咁佢返內地係咪都戴膠錶呢？佢諗都唔諗就話唔使，仲指指戴緊嗰隻錶話「戴呢隻！」果然轉數快喎。
卓妮